Ungir njósnarar

Bókin Ungir njósnarar var til á mínu bernskuheimili og er nú í minni eigu, gefin út árið 1973 og ég hélt að hún væri ný þegar ég var barn því að hún lýsti nútímalegri fjölskyldu þar sem enginn sérstakur munur var á strákum og stelpum. Þau voru alls ekki njósnarar en flæktust inn í dularfullt smyglmál og tókust á við hættulegan mann sem gekk undir ýmsum dulnefnum en sprakk upp í loft að lokum enda að smygla nítróglyseríni.

Ef þið sjáið teikninguna af börnunum að ofan sjáið þið líka að þau eru klædd og klippt eins og börn upp úr 1970 þegar ég man fyrst eftir mér. Ef netið hefði aldrei fæðst hefði ég kannski aldrei komist neitt lengra en með hjálp þess hef ég komist að því að bókin er í raun frá 1934 og heitir The Young Detectives sem eins og fólk sem kann ensku sér strax merkir alls ekki að þau séu njósnarar. Höfundurinn hét Reginald James McGregor (1887-1961) og vann sem skólastjóri. Hann er hressilegur höfundur og skrifaði líka leikrit. Ég fann enga mynd af honum á netinu en bókin hefur verið endurútgefin nokkrum sinnum.

Ungir njósnarar er ívið lengri og flóknari en bækur Enid Blyton sem fjölluðu um svipuð efni, foreldrarnir eru ekki jafn fjarlægir heldur eru þeir eins og þeir eru vinir barnanna sem er líklega ein helsta ástæðan fyrir að ég hélt að bókin væri ný því að ég ólst upp við þær aðstæður en hjá fyrri kynslóðum var oft meira bil milli foreldra og barna. Eitt atriði í sögunni gerist á markaði þar sem fólk reynir að vinna smáhluti með því að kasta og keppt er í alls konar hlaupum eins og í bókum P. G. Wodehouse sem voru í hávegum hafðar á heimili okkar.

Fjölskyldan í bókinni eru sjö manneskjur, fimm börn, móðir og frænka. Börnin gætu verið byggð á börnum sem McGregor þekkti því að þau hafa öll skýran en þó ekki einfaldan persónuleika og eru ekki staðalmyndir. Bókin er ekki mjög hræðileg þó að bófinn springi í loft upp í lokin. Ég á hana enn og hef ekki í hyggju að láta hana.